हुई सफल कमाई महाराज

    

हुई सफल कमाई महाराज, 

  भरतरी थारी,
भरतरी ओ थारी ।
 मालिक रे कारण
जोग फकीरी धारी ।
ईश्वर रे कारण
जोग फकीरी धारी ॥

 राजा सूतो महल रे माँय,
तरषणा जागी,
 तरषणा ओ जागी ।
ज्यां ने मिल गया गोरख नाथ,
भरमना ओ भागी ॥
 हुई सफल कमाई महाराज..

 राजा गयो जंगल रे माँय,
 दे रयो हेला,
 दे रयो हेला ।
ज्यां ने मिल गया
 गोरख नाथ,
मूड लिया चेला ॥
हुई सफल कमाई महाराज..

 राजा जावो
शहर रे माँय,
 दे आवो फेरी,
दे आवो फेरी ।
 पिंगळा ने कहिजो मात,
करो मत देरी ॥
हुई सफल कमाई महाराज..

 राजा गयो
 महल रे माँय,
दे रयो फेरी,
 दे रयो फेरी ।
भिक्षा घालो पिंगळा मात,
मत करो देरी ॥

हुई सफल कमाई महाराज..

 राणी खड़ी
महल रे माँय,
लटिया तोड़े,
लटिया तोड़े ।
 राजा एक दिन
 पकड्यो हाथ,
प्रीत काँई तोड़े ॥

हुई सफल कमाई महाराज..

 राणी खड़ी ड्योढ़ी के बीच,
 कलप रही काया,
कलप रही काया ।
 थारा मरजो गोरख नाथ,
राज छुड़वाया ॥

हुई सफल कमाई महाराज..

 राणी मत दे गुरुने गाळ,
करम रेखा न्यारी,
 करम रेखा न्यारी ।
 म्हारे लिखिया विधाता लेख,
 टरे नहीं टारी ॥

 हुई सफल कमाई महाराज..

 एक सोहन शिखर रे बीच,
 सांकड़ी सेरी, सांकड़ी सेरी ।
 ए गावे जरणानाथ,
भजन रा ओ लहरी ॥

 हुई सफल कमाई महाराज,

भरतरी थारी,
 भरतरी ओ थारी ।
मालिक रे कारण जोग फकीरी धारी ।
 ईश्वर रे कारण जोग फकीरी धारी ॥