लीलण म्हारी जाइजे जाइजे ,
गढ़ खरनाले शहर।
कोई गढ खरनाले शहर।
भाभल ने निवण देवजे।
ओ तेजाजी कैया जावा,
खाली म्हारी पीठ।
कोई सुनी म्हारी पीठ।
मावड़ली देशी ओळबा।
ओ लीलण म्हारी कहिजे कहिजे ,
साचोडा समचार।
तू तो साचोडा समचार।
नजरा सु देखी केवजो।
ओ तेजाजी ऐडा काई ,
लिखिया विधाता लेख।
म्हारा लिखिया विधाता लेख।
तेजल सु छेटी में पड़ा।
ओ लीलण म्हारी राखो राखो ,
मनड़ा माहि धीर।
कोई हिवड़ा माहि धीर।
स्वर्गा में मिलसी जिवडा।
ओ तेजाजी था बिन ,
म्हारे जीवन को नहीं सार।
म्हारे जीवन को नहीं सार ।
लीलण भी संग में चालसी।
ओ लीलण म्हारी में थारो चंदो ,
तू म्हारी है चकोर।
म्हारे काळजिया री कोर।
मानु में थाने जिव री जड़ी।
ओ लीलण म्हारी मत ना तू तो ,
आसुडा ढलकाय।
मत आसुडा ढलकाय।
तेजल रो कापे जिवडो।
लीलण म्हारी जाइजे जाइजे ,
गढ़ खरनाले शहर।
कोई गढ खरनाले शहर।
भाभल ने निवण देवजे
No comments:
Post a Comment
Note: Only a member of this blog may post a comment.