दर्शन देता जाइजो जी,
सतगुरु मिलता जाइजो जी।
म्हारे पिवरिया री बातां
थोड़ी म्हने,केता जाइजो जी॥
सोने जेडी पीळी पड़ गई,
दुनिया बतावे रोग।
रोग दोग म्हारे काई नी लागे,
गुरु मिलण रो जोग॥
म्हारे भाभे म्हने बींद बतायो,
पकड़ बताई बाँह।
कांई कहो में कांई न समझू,
जिव भजन रे माय॥
म्हारे देश रा लोग भला है,
पेहरे कंठी माला।
म्हारा लागे वे भाई-भतीजा,
राणाजी रा साला॥
सासरियो संसार छोडियो,
पीव ही लागे प्यारो।
बाई मीरा ने गिरधर मिलिया,
चरण कमल लिपटायो॥
